Nait veroordaild vuilen
t Leven bestaait uut meer as bloots gehandicapt wezen. Mien bepaarkens definiëren nait wèl ik bin en heuren nait allesbepoalend te wezen veur hou k leef. t Fokuswonen moakt dat meugelk. Zo as k in eerdere blogs al beschreven heb, het n cliënt van Fokus aigen regie over t leven. n Belangriek aspekt doarbie is, veur mie, dat je nait onvrijwilleg mit gehandicapten omgoan huiven.
k Wait al van t bestoan van Fokus sunt dat k as 12-joarege op de mytylschool (specioal onderwies veur kinder mit n liggoamelke bepaarken) zat. Doar haren ze de mond vol over integroatsie en akseptoatsie. Nou mout je joe serieus òfvroagen hou je gehandicapte kinder integreren loaten willen, as je ze op ain schoule bie nander vegen en boeten heur aigen woon- en leefomgeven onderwies geven. Doarmit leer je ze nait hou ze zoch in de soamenleven redden mouten. Wat wel belangriek is as je zulf de regie over joen leven voeren willen.
In t gehandicaptenwereldje vuil ik mie n boetenbaintje of n raandfeguur, doar kwam k al gaauw achter toun k noar de mytylschool ging. k Heurde der nait recht bie, en doar haar ik gain enkel perbleem mit, want k wol der ook nait bieheuren. Veul kinder, en ook veul van heur ollu, leken volledeg op te goan in t gehandicapt wezen. t Negatieve (ik kin ja niks, ik heb t zo stoer, aander lu hebben gain begrip veur mie) was overheersend aanwezeg. En nee … t is nait mooi as je duchenne hebben, zo as ik, mor aan zwelgen in zulfbeklag heb je nait zoveul. Joen leven gaait gewoon deur en je mouten pebaaiern t beste dervan te moaken. Dat heb k in mien loatere leven mitnomen, mit bv. n vervolgoplaaiden aan n reguliere schoule en loater dus t fokuswonen. Mit verpleeghuuszörg heb k 4 moand ervoaren (dat is 4 moand te veul), dat blift mie hopelk de rest van mien leven bespoard. k Bin ook gain lid van patiëntenverainens. k Wil mie gewoon nait ‘veroordaild’ vuilen tot t omgoan mit ‘lötgenoten’ (allenneg van dat woord krieg k al jeuk).
Der zellen genog cliënten wezen dij wel uut vrije wil omgoan mit aander cliënten en ‘lötgenoten’ en dij wel goud in ‘t wereldje’ gedijen (je hebben doar ook ja zulf de regie over), mor van mie huift dat aalmoal nait. Dat je doar de vrijhaid in hebben, is veur mie n kernweerde van Fokus.
